角膜切割激光矯視術(LASIK) @養和醫院 – 手術後分享

2014 年 1月 13 日

決定做矯視手術後，我係1月13日到養和醫院登記和預約手術時間。當日主要接受眼部檢查和電腦角膜掃瞄，一共需時2-2.5 小時，其中有一部分需要使用擴瞳眼藥水，滴左之後約半個鐘後睇近野會比較模糊 (大概持續左5-6 個鐘)。

醫生(張叔銘醫生)話我角膜比正常人薄，好彩自己近視唔算深(左右眼近視約250-300度，散光約200度)。醫生判斷後，認為我適合接受呢個手術，於是我就預約左手術時間(2月13日上午10點，張醫生只在星期一或星期四上午做手術)。

當天總費用: 檢驗費(EXAMINATION FEE) $850 + 電腦角膜掃瞄 (TOPOLYZER) $350 = $1230

2014 年 2月13日

當日我7點就起左身，因為姑娘要求我當日早上9點正去到養和醫院(手術前1小時)，去醫院前最好洗左頭先(因為未來幾日唔洗得頭)，同埋去到養和要量體溫、血壓、食止痛藥、滴麻醉藥等等，之後姑娘帶左我去一個地方坐。

手術過程主要分為兩部分:

第一部分:

1.      滴眼藥水作表面麻醉。

2.      用微形切割器或激光切割器在角膜表面製造角膜瓣。

無記錯手術前一共滴左2次麻醉，製造角膜瓣前醫生會有儀器令到你眨唔倒眼，我唯一要做既就係集中精神望住光環中間既黑色部分，之後有舊野會壓一壓隻眼，唔痛，但有感覺。做完呢PART 眼入面有D氣泡，睇野朦朦地，姑娘帶我番去岩先既地方坐。

約30-45分鐘後，經姑娘檢查發現我雙眼無晒氣泡後，我就繼續接受第二部分既手術:

第二部分:

1.      將角膜瓣掀開,再利用激光於角膜基層上進行打磨。

2.      將角膜瓣回復原位。

一樣，係進行第二部分前姑娘再次為我滴麻醉藥，係網上聽倒人地話掀開角膜瓣同打激光果陣會痛…但我做果時就一D 痛既感覺都無，只係當醫生掀開角膜瓣果時我睇野會突然朦左好多, focus 唔倒，有幾次唔集中唔倒同埋睇唔倒中間既綠燈。打完激光醫生會用幫我清洗傷口，感覺涼涼地，之後佢同我講可以合埋眼，繼續做另外果隻。由掀開角膜瓣到打完激光每隻眼都係需時1分鍾左右(掀開角膜瓣約15-20秒，打磨角膜約15-20 秒，將角膜瓣回復原位和清洗傷口約20-30 秒)

做完之後出去休息左約20分鐘，醫生檢查左一下我對眼，之後姑娘幫我戴一個膠既眼罩(第二日早上先可以除)。當日我話無屋企人接我走，佢地就派人送我落去搭的士。番到屋企之後我訓左8個鐘，夜晚9點先起身，當中並無任何唔舒服，醫院比果3粒止痛藥我都無食到。

*當天約中午12點離開醫院

當天總費用: 視力矯正術(REFRACTIVE SURGERY):$22000


2014年2月14日

2月13號比既費用己包翌日、一週、一個月、 三個月及六個月既覆診費用，當日我照舊9點去到養和覆診，醫生檢查完我雙眼話我傷口康復得比人般人慢，叫我多D休息，之後姑娘帶左我出去，介紹尋日比我既果個藥包，入面有3支眼藥水，仲有8支好細既人工液淚。標籤寫晒幾時開始用同埋幾耐用一次，所以唔需要擔心唔知幾時用邊隻。張醫生既病人一般3星期之後先番黎，但我3月7號果日唔得閒，所以約左3月14號覆診，直接skip 左一星期果次。

藥包同藥水

 人工淚液

每2小時滴一次，開啟後12小時須棄掉。

因為要一直滴人工淚液到下一次覆診，所以當日要買多盒人工淚液。

當天總費用: 人工淚液(MEDICATION) : $120


2014年3月14日

當日按預約時間早上9點去到，姑娘幫我做左個視力測試後再去見醫生。醫生話我康復得幾好，問我眼有無成日好易乾(我無)，佢叫我黎緊呢兩個月繼續滴一隻叫 "FML" 既眼藥水(好似話用黎穩定視力)。當日10 點半就離開養和。

當天總費用: FML眼藥水(2支, 一個月用一支) : $90

2015年2月20
事隔一年，最後一次去養和做medical check for eyes, 呢次只係由視光師幫你量度散光/近視，唔使見醫生。原來自己無近視，但左、右眼各有75同50度散光(有朋友做完一段時間都有番散光)，平時睇野都仲係無問題，希望散光唔好再深:)